غريبة اليُوم.. على الماء،
تونس من أكثر الدول المهددة بنقص المياه وتعتبر تحت خطر الفقر المائي، تكرر موجات الجفاف وتغيّر المناخ إلي وصلنا اليوم سدودنا فارغة بنسبة تقريب 80% من طاقتها، هذا بخلاف المناطق العديدة إلى تفتقر للماء الصالح للشراب وإلي خلى المواطنين يحتجوا في عديد المناسبات.
أما بالرغم من الخطر هذا الدولة التونسيّة ماهياش عاطية قيمة للماء، فيبالك الّي الشّركات الّي تستحق للماء باش تُتنج وتبيع منتوجاتها، ما تخلّص كان 50 مليم إي نعم 50 فرنك على كل 1 متر مكعّب من الماء مستهلك للاستغلال غير الفلاحي؟
في قرار مشترك بين وزير الاقتصاد والمالية ووزير الفلاحة المؤرّخ في 3 نوفمبر 2014 والمتعلّق بضبط المعاليم المستخلصة عن استعمال مياه ورمال الملك العمومي للمياه، يحدّد التّعريفة المطبّقة على المتر المكعّب الواحد المُستغل من الملك العمومي للمياه بــ 5 ملّيم بالنّسبة للاستغلال الفلاحي، و50 ملّيم للاستغلال غير الفلاحي.
باش نعطيوكم لمحة صغيرة على قيمة المعاليم المُستخلصة من بعض الشّركات المُستغلّة للملك العمُومي للمياه، واخترنا نحكيو أساسا على شركات تحويل الطّماطم وشركات تعليب المياه الّي من بين أكثر الشّركات الي تستعمل برشا ماء.
خليني نقلّك الّي المعاليم الّي تمّ استخلاصها من جميع شركات تحويل الطماطم الّي بلغ عددها حوالي 25 شركة، مُقابل استغلالها للملك العمومي للمياه في ثلاثة سنوات من 2019 إلى حدود سنة 2021، قُدّرت بــ 25،544 دينار و160 ملّيم اجمالا، بمعنى أنو الشركة الواحدة تخلّص بمعدّل 340 دينار في العام. وطبعا هذا يتغيّر من مصنع الى آخر حسب كمّية الإنتاج لكلّ مصنع.
مع التّذكير بأنّو تحويل الطّماطم من بين الصّناعات المُستنزفة للثروة المائيّة، ومن أكثر الصناعات الملوثة للبيئة والّي هي من المنتوجات المعدّة للتّصدير، وهذا الّي يتناغم مع السياسات المعتمدة من الاتحاد الأوروبي الّي تشجّع على استيراد المواد والمنتوجات الّي تستوجب استعمال برشا ماء.. طبعا هوما يخمّمو في حماية مخزونهم المائي في الحاضر وحماية حق الأجيال القادمة في الماء في المستقبل، وفي المقابل نحنا دولتنا تقدر قيمة الماء 50 مليم وتصدّر ثروتنا المائيّة في غياب لاستراتيجيّة واضحة وفي ظل تهديد بالشّح المائي حذّرو منّو الخبراء منذ فترة.
أما كيف نجيو لقيمة المعاليم المُستخلصة من شركات تعليب المياه الّي بلغ عددها 24 شركة، لقاء استغلالها للملك العُمومي للمياه في ثلاثة سنوات من 2019 إلى 2021، نلقاوها 596،675 د و600 ملّيم إجمالا، بمعنى أنّو الشّركة الواحدة تخلّص بمعدّل 8200 دينار في العام تقريبا مُقابل استغلال الملك العمومي للمياه،
يعني الشّركة الواحدة من بين شركات تحويل الطماطم قاعدة تستغلّ في الماء بمعدّل 6812 متر مكعّب في العام، والشركة الواحدة من شركات تعليب المياه تستغلّ ما يقارب الــ 165743 متر مكعّب من الماء في العام الواحد، مقابل 50 ملّيم فقط للمتر المكعب الواحد، في الوقت الّي وزارة الفلاحة ترفع في شعار "الماء ذهب" ...
#كل_يوم_غريبة
1 متر مكعّب من الماء يساوي 50 مليم
|
0 مشاركة
